E Bidderedd...
Rhoihessisch platt

Ihr liebe Leit - ich sitz doo rum -
und frooch mich werklich - sin mir dumm?

Die PISA-Studie und die Kinner -
mer glaabts jo net! īS werrd als schlimmer!
Wie weit is Deutschland nur gesunke?
Taachteeschlisch Negativbefunde!

Die deutsche Schüler sin so schlecht!
Drum schafft mer neies Schreiberecht!
Schifffahrt mit drei "f" geschribbe,
Wördder nei zusammeflicke,
monsche werrn jetz nei getrennt,
als merīs in de Schul gelernt.
De Duden werrd so oft erneiert,
fast jeden Daach e Wort gefeiert,
was die große Rechtschreibweise,
habbe sich ergrübelt - leise.

Flexibel muss de Mensch heit soi,
mer denkt sich doch aach was debei!
Die Schüler solle oofach sehe,
mer konn aach onnern Weesche gehe.
Die fiern zwar net direkt nooch Rom,
doch welchen intressiert des schon?
Un brauche werrn seīs irschendwo
gonz bestimmt aach widder mo.
Denn wenn die Rechtschreibweise taache,
doo konn mer garnet sicher saache,
ob so mansches, was begonne,
oofach werrd zurickgenomme,
in e paar Jahr widder kimmt -
hurra, hurra - es lacht es Kind!

Was gestern falsch, is heit doch rischdisch,
lerne is doo garnet wichtisch!
Is de Schüler donn von heit,
noch net emol dezu bereit,
es Rischdische so falsch zu schreibe,
dass alde Fehler oofach bleibe?
So kennt en Sechserkandidat
en Oonzer schaffe - ohne Frach!
Wie konn en Schüler sich doo waache,
grad im Digdat so zu vesaache...?!

Is die Juuchend escht so dumm?
laafe lauder Narrn erum?

Es geht berschab mit unserm Staat!
Die Zukunft werrd gonz knibbelhart!
In allem sin mir Deutsche schlecht,
was is es doch so ungerescht!

Nur in oonem sin mir Spitze,
fällt mer oi, wo ich doo sitze!

Geht en Deutsche übbers Feld
sieht er nix mehr von de Welt!
Die Äbbel uff de Beem hoch obbe
deet der niemools sich abrobbe!
Bicke deet er sich nooch unne,
nur faule Äbbel werrn gefunne!
Solche mit de Wemmer drin -
nur des ergibt ferr Deutsche Sinn.
Die uff de Beem werrn hänge losse,
des wurd von longer Hond beschlosse!
Weil aach in dene kennt sichīs tummle,
sich so en Womm ins Kernhaus schummle.
Drum lässt mer die aach weider hänge
un konn so besser uff se schenne!

Schenne bis se oofach faule,
bis zum Dörrobst mit ne maule!
Niedermache, kompottiere
dass se bleed sin, losst se spiere!
Wenn se endlich gonz velasse,
im Gesellschaftswind veblasse,
wenn se hänge in de Äst,
gibbt ene de Hartz de Rest!
Kleingeschrödert, ausgemerkelt,
hänge se wie Traubeperggel
nooch em Leese un de Kelder
- sin segar noch deutlich welger.

Jetz is bald die Zeit gekomme,
die mer sich sonst nie genomme.
Die Bligge gehn jetz in die Heh,
jetz sieht mer alle Äbbel schee,
die noch uff em Derrgeribbe
offach sin zurickgeblibbe.
Hallo - rieft de Bürscher barsch -
ihr hängt doo offach faul erum!
Bewescht jetz endlich eiern Po,
ihr wollt nix mache, stellt eich dumm!

Die Juuchendlische sin die Dumme!
Des hat mer rischdisch rausgefunne.
Doch doll sin unser Kinner net!
Wenn sich nur wer gekimmert hätt
- um die Kinner un ihr Könne -
statt PISA hinnerher zu renne...
En Mensch hott viel mehr Fähischkeide,
als kennt erīs in de Schul beweise.
Mensche misse Mensche bleibe,
net meschanisch Oonzer schreibe.
Kooner is so gonz perfekt!
Un selbst de PISA-Turm is schepp!

Drum losst de Miesepeder soi
un beißt mol in en Appel noi.
Un sollt er doo en Womm entdecke
der bleibt schon net im Halse stecke!

Zurück zur Übersicht

Zurück zur ersten Seite